Lokalprogram-2011---2015

Raudt er eit parti som vart stifta 11. mars 2007 av RV, RU, AKP og tidlegare partilause.

Yt etter evne – Få etter behov!
Det viktigaste verktøyet for utføringa av Raudt sin politikk, er folk sin eigen innsats. Difor må folk sjølv ta tak i saker. Me har ingen tru på at byråkratiet og politikarane åleine kan snu samfunnsutviklinga eller å laga ein politikk som er utforma for å gagna folk flest. Raudt vil sloss for eit samfunn der folk aktivt er med å styra sin eigen kvardag, eit samfunn der folk yt etter evne og får etter behov!

Toppkandidatane:

1. Ida Nordli-Kaldestad

Ida er 28 år gammal og er prosjektleiar for internasjonal kafè på Voss. Ho har vore styremedlem i Raudt Voss i 2 år. Ida sit også i styret i Røde Kors omsorg, og er frivillig vakt ved Voss Krisesenter.

2. Tore Eikeland

Tore har vore varamedlem til kommunestyret i fleire periodar. Han er ein erfaren lokalpolitikar, som også er leiar av Voss og omland Human-Etisk Forbund. Tore arbeider til dagleg ved lokalsjukehuset på Voss som bioingeniør.

Program

Raudt Voss sitt valprogram for perioden er det mest demokratiske program som nokon gong er vorte presentert i ein valkamp på Voss. Heile programmet har i over eit år vore tilgjengeleg på ein wiki-basert nettside der alle har hatt mogelegheit for å endra på innhaldet.

Arbeids og næringsliv
Raudt ynskjer eit tett samarbeid med arbeidstakarorganisasjonane, og vil lytte til desse i spørsmål som angår dei. Me er av den oppfatning av at det er arbeidet som skaper dei store verdiane i samfunnet, ikkje dei som sit på pengesekken. Det er ellers eit viktig mål for Raudt å jobbe for eit betre miljø for skaping av nye arbeidsplassar i kommunen.
Raudt Voss ynskjer:
- å redusere uynskja deltidsstillingar
- at fagforeiningane involverast meir i drifta av verksemdene
- å jobbe for at det vert enklare å skape sin eigen arbeidsplass
- at Vangsgata vert gjort om til gågate - arbeide for at det skal bli lettare å etablere lokale verksemder
- at ingen skal trenge å jobbe meir enn 6 timar kvar dag.

Kommuneøkonomi
Regjeringa vår har svikta kommunane. I 2010 hadde regjeringa lagt opp til eit planlagt underskot for kommunane på 19.1 mrd. (stortingsmelding nr 1 – Nasjonalbudsjett 2010 – side 220). - Har ei slik regjering krav på budsjett-disiplin fra kommunene? Raudt meiner NEI! Som eit resultat av dette røysta også *Raudt imot innføring av eigedomsskatt. Det er feigt av oss som kommunalt folkevalgte å sparka nedover mot velgarane våre, når det heilt tydeleg er dei over oss som gjer noko riv ruskande gale. Me må ansvarlegjera dei ansvarlege!

Raudt Voss vil:
• At dei Statlege overføringane aukast slik at dei dekkjer kommunen sine kostnader til lovpålagde oppgåver.
• At Staten slettar gjelda til kommunen.
• At kommunen sin del av skatteinntektene aukast kraftig
• At kommunen vedtek budsjett utifrå befolkninga sine behov for tenesteyting. Kravet til budsjettbalanse kan ikkje overordnast behovet for gode velferdsordningar.
• Kjempe mot ei utvikling med privatisering og markedsretting av kommunal forvaltning.
• Ha innbyrdes samarbeid mellom kommunane for å hindre at staten sin spare- og privatiseringspolitikk blir gjennomført.
• At offentlege selskap skal drivast til det beste for folk flest, og ikkje etter aksjeloven.
• gjennom undersøkjingar mellom tilsette og brukarar i kommunen finna ut korleis tenestene kan bli betre
• gå mot eigedomsskatt på vanlege bustader.
• at kommunen skal vera ein aktiv eigar av eigedom og verksemder
• redusera ordførarløna, for å minka avstanden mellom politikarar og vanlege folk.
• Jobba for å reversera ålmenn eigedomsskatt

Kultur
Raudt Voss ynskjer å utvida kulturbegrepet som vert nytta i Voss kommune. Me er av den oppfatning at kultur er eit samleomgrep for alt som omfatter menneskas åndelege og materielle aktiviteter. Dette gjer at Raudt ynskjer større fokus på dei gruppene som i dag dett utanfor kulturdefinisjonen i Voss kommune. Med eit nytt kulturhus klart vert det å styrke kultur som fell utanfor dagens definisjon endå viktigare.

Raudt ynskjer auka satsing på kultur gjennom
- styrking av kulturskulen
- støtte til uorganiserte aktivitetar
- auka bevilningar til frivillige kulturinstitusjonar og idrottslag
- fokus på førebygging gjennom kultur
- arbeida for at kultuirhuset vert eit hus for alle typar kultur - arbeida for at gamlekinoen vert konsertsal for akkustisk musikk

Landbruk
Raudt Voss er for eit sterkt landbruk som baserer seg på lokale ressursar i distriktet, og som driv innanfor økologisk forsvarlege rammer. Me meiner at jord- og skogbruk ikkje berre er viktig for dei som driv i næringane, men for heile samfunnet.
Raudt Voss vil kjempa for:

- Auka løyvingar frå staten til primærnæringane.
- At økologisk jord- og skogbruk vert oppmuntra gjennom særskilde stønadsordningar.
- At dyrka mark ikkje skal nyttast til andre føremål.
- Statlege stønadstiltak som kompenserer det bøndene tapar ved at ein opprettheld levedyktige bestandar av rovdyr.

Miljø og naturvern 
Raudt Voss er for eit lokalsamfunn i økologisk balanse, eit lokalsamfunn der naturen sin eigenverdi skal proriterast framfor mogeleg kortsiktig økonomisk gevinst.
Raudt Voss vil:
- Byggje fjernvarmeanlegg i sentrum, basert på varme frå grunnvassanlegg eller bioteknologi
- Jobba for omkamp om monstermastane i Hardanger
- Arbeida aktivt mot utbygging av Raundalselva, også gjennom sivil ulydnad.
- Lage lokale ordningar som stimulerar og hjelper folk til energisparing og reduksjon av utslepp
- Arbeida for at det vert utarbeid klimarekneskap for avdelingane i kommunen, og at alle tiltak som kan redusera utsleppa vert vurderte.
- At sentrum får fleire grøne områder med ein levande gågate i Vangsgata.

Omsorg og helse
Raudt Voss vil arbeida for ein heilskapeleg helse og omsorgspolitikk. Etter vårt syn er heng helse og omsorgsarbeidarane sin trivsel saman med tenestemottakarane sin trivsel og tryggleik. 
Raudt vil difor arbeida for:
- 6 timars normalarbeidsdag med full lønskompensasjon
- Brukarstyrer med forslags og uttalerett i alle saker som berører helse og omsorgsfeltet
- Ynskt stillingsbrøk skal alltid takast omsyn til ved tilsetjing
- Auka bemanning
- At brukarar syne ynskje vert teke til fylgje så langt det let seg gjera.


Oppvekst
Raudt meiner at alle born, uavhengig av foredras inntekt har krav på ein trygg oppvekst. Raudt vil difor arbeide mot all form for privatisering innan skuleverket.

Skule
Raudt Voss er for ein skule som set kunnskap i høgsetet. Skulevesenet må ha som mål å danna elevane til kritiske og handlingsdyktige menneske. Det kan ein berre gjera ved å formidla kulturarven så breitt og djupt som råd er, på tvers av alle ismar og ideologiar. Dei tre siste tiåra har nyliberalismen prega samfunna i den rike verda. Det har gjeve utdanningsreformer som i aukande grad øydelegg kvaliteten på opplæring og
oppseding. Nyliberalisme reduserer kunnskap til teknisk kompetanse,handling til manipulerbar åtferd, elevar til økonomiske innsatsfaktorar og kultur til kostnadstung ulempe. Raudt Voss er sterke motstandarar av denne tendensen

Raudt Voss vil:
Forsvara einskapsskulen og grendaskulane.
- Gå mot bruk av resultatløn for lærarar, av di det øydelegg motivasjon og hindrar samarbeid.
- Krevja auka lærartettleik og betre arbeidsmiljø for elevar og lærarar.
- Slåst for løyvingar som gjer det mogeleg å følgje lovverket.
- Ta del i dei masseaksjonane som er naudsynte for å forsvara skuleverket

Barnehagar og SFO
Regjeringa meinar at full barnehagedekning betyr at 80% av borna har eit tilbod. Raudt meinar at full dekning er 100%. Alle som har behov for barnehage eller plass i SFO må få lovfesta rett til dette.

Raudt Voss krev:
- 100 prosent dekning for barnehage og SFO.
- Tilbod om norskopplæring for innvandrarar i barnehagen.
- At alle tilsette i barnehagar og SFO, uavhengig av utdanning må få tilbod om tariffavtalar.
- Minimum ein tilsett per fire born i barnehagen.

Samferdsel
Voss står ovanfor viktige samferdselpolitiske spørsmål i tida som kjem. Tildømes må me ta inn over oss den nye situasjonen me får med vossapakko. Raudt meiner at me no har ein unik sjanse til å tenka kollektive alternativ innan samferdselsektoren.
Raudt Voss vil jobba for:
-2 spors togbane mellom Voss og Bergen
-samanhengande sykkelvegnett.
-betre kollektivtilbod i heile kommunen
-betre rassikring og trafikktryggleik

Sosialsektoren
Voss har ein formidabel jobb å gjera i høve førebygging av fattigdomsproblematikk. Tal frå SSB syner at Voss har over dobbelt så mange sosialhjelpsmottakarar i høve folketalet som gjennomsnittet i Noreg, dessutan er utdanningsnivå og lønsnivå lågare på Voss enn i resten av landet. I tillegg til dette har Voss færre sosialarbeidarar tilsett per sosialklient, lågare utbetaling til sosialhjelpsmottakarar og færre såkalla lågterskel tilbod til ungdom enn det landsgjennomsnittet har. Kanskje er funna i ruskartlegginga frå 2007 eit resultat av dette, kartlegginga viser at Vossaungdommen både rusar seg tidlegare, oftare og har eit generellt meir liberalt syn på illegale rusmidlar enn landsgjennomsnittet. I tillegg må flyktningar vente i opptil fleire år før kommunen kan skaffe boligar, slik at dei kan starte med å ta del i verdiskapinga i samfunnet.

Raudt Voss krev:
- At sosialhjelpssatsane vert auka til Statens institutt for forbruksforsking sine satsar
- At det vert bygd fleire billige kommunale bueiningar
- At fleire stillingar vert oppretta i sosialtenesta, barnevernet og dei førebyggande tenestene
- At det vert lagt til rette for ungdomsaktivitetar på ungdommens premissar
- At Voss får ein døgnopen utekontakt
- At Flyktningearbeidet i kommunen skal verta eit prioritert området i den neste 4 års perioden.

Kontakt oss:

www.raudt.no/raudt_voss voss@raudt.no