Dette blir den viktigaste saka i Kultur- og ressursutvalet i Hordaland fylke i dag. Utvalet startar sakshandsaminga i fylkeshuset i Bergen kl. 12.30. Saka skal slutthandsamast i Hordaland fylkesting den 12. og 13.oktober.

Raudt er i dag representert med fylkestingsrepresentant Dijana Milicevic Saga. Ho vil leggje fram eit heilskapleg alternativ til innstillinga.

Raudt sitt framlegg byggjer m.a. på Naturvernforbundet i Hordaland si høyringsfråsegn. I tråd med vår grøne politikk, går Raudt inn for at Hordaland fylke skal ta særleg omsyn til biologisk naturmangfald, friluftsinteresser og store landskapsverdiar (t.d. fjordlandskapet) og ikkje gje løyve til utbyggjing i villmarsområde. Raudt vil og vere restriktiv til småkraftutbyggjing i randsonane til nasjonalparkane. Raudt vil og foreslå at samfunnsøkonomiske verknader av småkraftutbyggjing blir samanlikna med og vurdert opp mot turisme, reiseliv og friluftsliv.

Innstillinga frå fylkesrådmannen er sterkt påverka av kraftbransjen, grunneigarinteresser og andre lokale særintersser. Framlegga er altfor uforpliktande og vil kunne opne opp for ei storstilt småkraftutbyggjing i Hordaland på tvers av omsynet til miljøet og framtidige generasjonar.

For nærare kommentarar:
Dijana Milicevic Saga  tlf. 98070705 (fast medlem av utvalet)
Terje Kollbotn tlf. 97194073 (1.varamedlem i utvalet)