Tenkjer Folkvord på kommunestyrefleirtalet sitt ti-årige billegsal av kommunen si konsesjonskraft til SØRAL? Eller utbetalinga av mange kommunale millionar kroner årleg til riksvegar ( seinast 10 millionar i forskottering til Opheimsgata)? Eller dei nærare 30  millionane i kommunale tilskot til Hardanger Vekst A/S ? Eller 10 millionar til m.a. sprø kinesisk stein på Torget? Eller tenkjer Folkvord på den nokså mislukka omstillingsprosessen i kommunen, med høgre konsulenthonorar til KPMG og store lønstillegg til 43 tenestestadleiarar? Eller utskiljinga av Bygg& Eiendom til eige kommunalt foretak? Eller tenkjer Folkvord på dei store tillegga i rådmanns- og ordførarløna i fjor? Eller bruken av dyre private vikarbyrå til nærare tjue millionar innan pleie- og omsorgsektoren dei siste to åra? I fall han vil ta sjølkritikk på noen av desse områda, er dette i tråd med Raudt (tidlegare RV) sitt syn.

Eller meiner Folkvord at Odda kommune har brukt for mykje pengar på barnehagar, SFO og skule i Odda - eller  eldreomsorg, kultur eller vedlikehald av kommunale bygg og anlegg dei siste åra? Og på kva driftsområde meiner Folkvord at det no bør kuttast minst 18 millionar på drift og 50 årsverk? Som gruppeleiar og partileiar for Arbeiderpartiet og leiar av driftskomiteen dei siste  åra, bør Folkvord kunne kome med tydelege svar i avisa, inkludert ei sjølkritisk vurdering av Arbeiderpartiet sitt eige ansvar for ein vanskeleg kommuneøkonomi. Før kommunevalet sa han lite om dette. No hevdar han plutseleg at kommunekassa i Odda er tom.

Helsing Terje Kollbotn (gruppeleiar for Raudt)