Det neste halvåret skal Odda kommunestyre handsame både reguleringsplanen for Smelteverkstomta og ny kommuneplan, kulturplan og økonomiplan. Alle desse sakene er for viktige til å bli overlatt til kommunestyret åleine. Skal vi kunne lykkast, må vi ta med oss arven frå kraft- og industrireisinga i Odda/Tyssedal. Den gongen gjekk industri- og kultursatsing hand i hand. Samhold gav styrke. Smeltedigelen Odda var ope mot verda og nye impulsar utanfrå.

Her er ti forslag til kva som bør skje framover:

-Det må gjennomførast ein ny høyringsrunde og ei meir demokratisk og ryddig handsaming av reguleringsplanen Almerket / Smelteverksområde nord. Dette vil RV vere med og ta initaitiv til.

-Kommunestyret må innarbeide både friområde og bustader i reguleringsplanen Almerket/Smelteverket nord. Denne odden ut mot fjorden – som har gitt byen namn – må bli ein spanande myldreplass med kai/båthavn, kulturelle aktivitetar, forretningar/ kontor, kafedrift, bustader, servicetilbod og park/friområde både for oddingar og gjester/turistar.

-Byggvarefirmaet Monter må bli sikra ei god løysing når det gjeld arealauke og vidare utvikling på Eitrheim, slik RV foreslo i kommunestyret like før jul.

-Det omstridde stålbygget (eksportlageret) midt på Almerket blir seld, demontert og flytta - og inntektene blir nytta til å rydde opp og klargjere området for ny vekst.

-I reguleringsplanen for Smelteverksområdet sør og i kommuneplanen kjem det på plass ei varig riksvegløysing for gjennomgangstrafikken / tungtrafikken utanom Odda tettstad. Ei slik”Odda-pakke” er ein føresetnad for ei ei miljøvenleg sentrumsutvikling.

-Dei tidlegare eigarane av Odda Smelteverk A/S må overdra resten av tomta til Odda kommune vederlagsfritt. Samstundes må dei bli stilt ansvarleg for å betale all opprydning (inkludert nødvendig riving). Staten må forskottere beløpet.

-Når reguleringsplanen er klar, må Odda-samfunnet samle seg om eit felles krav til stat og fylke om sterk økonomisk medverknad til å utvikle heile Smelteverkstomta til eit mangfald av arbeidsplassar og kultur- og fritidstilbod for folk i alle aldrar, ikkje minst barn og ungdom.

-Båtinteresserte blir inviterte til å vere med på å opparbeide den nye båthavna ved importkaia (aust for Opo). Kommunen startar opp arbeidet med den nye strandpromenaden rundt odden, hengebrua over Opo og den nye turstien langs Opo.

-Det blir gjennomført ein stor Odda-dugnad for å gjere heile sentrum reint og triveleg. Smelteverksporten blir opna, gjerdene blir reve / flytta og dei første bygga som kommunen alt har overtatt, blir rusta opp og tatt i bruk

-Når alt dette er godt i gang, fortener vi ein Odda-festival - med eit allsidig program i den nye båthavna, langs Smelteverkskaia og Opo, i Dicy-lageret, på det nye Allemannsmerket (Almerket), i Lindehuset og på andre deler av tomta som i dag ligg meir eller mindre brakk.

I jubileumsåret 2006 treng vi både draumar og visjonar, realistiske og konkrete mål og ikkje minst eit breidt samarbeid og folkeleg engasjement for å nå gode resultat.

Godt nytt år!

Terje Kollbotn
Leiar i Hordaland RV og kommunestyrerepresentant i Odda